دنیا میں کوئی دل کا خریدار نہ پایا

دنیا میں کوئی دل کا خریدار نہ پایا

سب دیکھے دل آزار ہی دل دار نہ پایا

کب غیر کو ہم رہ ترے اے یار نہ دیکھا

تجھ گل کو کبھی ہم نے تو بے خار نہ پایا

تجھ رخ سے نہ برقع اٹھا اے غیرت خورشید

ذرہ ترا مشتاقوں نے دیدار نہ پایا

ہم سر ہی پٹکتے رہے دروازے کے باہر

پر گھر میں ترے آنا کبھی بار نہ پایا

کس سے کہوں اپنا غم دل آہ عزیزاں

دنیا میں کوئی مونس و غم خوار نہ پایا

ہر طرح گلے پڑ کے دیا ہم نے تجھے دل

جب تجھ سا یہاں کوئی طرح دار نہ پایا

دیکھ اس کی ہوئی ایسی ز خود رفتگی تجھ کو

کل آپ میں میں تجھ کو جہاں دارؔ نہ پایا

duniya mein koi dil ka kharidar na paya

sab dekhe dil azar hi dil dar na paya

kab ghair ko ham rah tire ai yar na dekha

tujh gul ko kabhi ham ne to be khar na paya

tujh rukh se na burqaa utha ai ghairat-e-khurshid

zarra tira mushtaqon ne didar na paya

ham sar hi patakte rahe darwaze ke bahar

par ghar mein tire ana kabhi bar na paya

kis se kahun apna gham-e-dil ah azizan

duniya mein koi munis-o-gham khwar na paya

har tarah gale par ke diya ham ne tujhe dil

jab tujh sa yahan koi tarah dar na paya

dekh us ki hui aisi ze khud raftagi tujh ko

kal ap mein main tujh ko jahan dar na paya