Arooz is now on the App Store, for iPhone and iPad. Download →

All poetry

دو دموں سے ہے فقط گور غریباں آباد

Taashshuq Lakhnavi (1824–1892)

دو دموں سے ہے فقط گور غریباں آباد

تم ہمیشہ رہو اے حسرت و ارماں آباد

تجھ سے اے درد ہے قصر دل ویراں آباد

کیا سرافراز کیا خانہ ویراں آباد

جس جگہ بیٹھ کے روئے وہ مکاں ڈوب گئے

شہر ہونے نہیں دیتے ترے گریاں آباد

قیس و فرہاد کے دم سے بھی عجب رونق تھی

کچھ دنوں خوب رہے کوہ و بیاباں آباد

وحشت دل یہ بڑھی چھوڑ دیئے گھر سب نے

تم ہوے خانہ نشیں ہو گئیں گلیاں آباد

آمد قافلۂ درد و الم ہے صد شکر

آج ہوتی ہے سرائے دل ویراں آباد

مٹ گئے داغ جگر حسن رخ یار گیا

کل کی ہے بات کہ تھا کیا یہ گلستاں آباد

تیرے دیوانوں کے جس دشت سے اٹھے بستر

وحشیوں سے نہ ہوا پھر وہ بیاباں آباد

صورت شمع ہوا خاک بدن جل جل کر

ہم نے تربت بھی نہ کی اے شب ہجراں آباد

صحبتیں ہو گئیں برباد گل انداموں کی

خاک اڑتی ہے وہاں تھے جو گلستاں آباد

سینہ و دل میں خوشی سے نہ جگہ تھی غم کی

اے تعشقؔ یہ مکاں بھی تھے کبھی ہاں آباد