دن کو بحر و بر کا سینہ چیر کر رکھ دیجئے

دن کو بحر و بر کا سینہ چیر کر رکھ دیجئے

رات کو پھر پائے گل رویاں پہ سر رکھ دیجئے

دیکھیے پھر کیا دمکتے ہیں گل اندامان شہر

اک ذرا ان میں محبت کا شرر رکھ دیجئے

آہوان شب گریزاں ہوں تو ان کی راہ میں

دام دل رکھ دیجئے دام نظر رکھ دیجئے

بت پرستی کیجیے اس شدت احساس سے

سنگ میں بھی جزو احساس و خبر رکھ دیجئے

زہد اگر جنگ آزما ہو کھینچیے شمشیر شوق

حسن اگر مد مقابل ہو سپر رکھ دیجئے

راحت جان ظفرؔ ہیں شاہدان بے ہنر

روندنے کو ان کے قدموں میں ہنر رکھ دیجئے

din ko bahr-o-bar ka sina chir kar rakh dijiye

rat ko phir pae gul rawiyan pe sar rakh dijiye

dekhiye phir kya damakte hain gul andaman shahr

ik zara un mein mohabbat ka sharar rakh dijiye

ahuin-e-shab gurezan hun to un ki rah mein

dam-e-dil rakh dijiye dam-e-nazar rakh dijiye

but parasti kijiye is shiddat-e-ehsas se

sang mein bhi juzw-e-ehsas-o-khabar rakh dijiye

zohd agar jang azma ho khinchiye shamshir-e-shauq

husn agar mad-e-muqabil ho sipar rakh dijiye

rahat jan zafar hain shahidan-e-be hunar

rondane ko un ke qadmon mein hunar rakh dijiye