دم اخیر بھی ہم نے زباں سے کچھ نہ کہا

دم اخیر بھی ہم نے زباں سے کچھ نہ کہا

جہاں سے اٹھ گئے اہل جہاں سے کچھ نہ کہا

چلی جو کشتئ عمر رواں تو چلنے دی

رکی تو کشتئ عمر رواں سے کچھ نہ کہا

خطائے عشق کی اتنی سزا ہی کافی تھی

بدل کے رہ گئے تیور زباں سے کچھ نہ کہا

بلا سے خاک ہوا جل کے آشیاں اپنا

تڑپ کے رہ گئے برق تپاں سے کچھ نہ کہا

گلہ کیا نہ کبھی ان سے بے وفائی کا

زباں تھی لاکھ دہن میں زباں سے کچھ نہ کہا

خوشی سے رنج سہے نازؔ عمر بھر ہم نے

خدا گواہ کبھی آسماں سے کچھ نہ کہا

dam-e-akhir bhi ham ne zaban se kuchh na kaha

jahan se uth gae ahl-e-jahan se kuchh na kaha

chali jo kashti-e-umr-e-rawan to chalne di

ruki to kashti-e-umr-e-rawan se kuchh na kaha

khata-e-ishq ki itni saza hi kafi thi

badal ke rah gae tewar zaban se kuchh na kaha

bala se khak hua jal ke ashiyan apna

tarap ke rah gae barq-e-tapan se kuchh na kaha

gila kiya na kabhi un se be wafai ka

zaban thi lakh dahan mein zaban se kuchh na kaha

khushi se ranj sahe naz umr bhar ham ne

khuda gawah kabhi asman se kuchh na kaha