دلی سے واپسی

رخصت اے دلی تری محفل سے اب جاتا ہوں میں

نوحہ گر جاتا ہوں میں نالہ بہ لب جاتا ہوں میں

یاد آئیں گے مجھے تیرے زمین و آسماں

رہ چکے ہیں میری جولاں گاہ تیرے بوستاں

تیرا دل دھڑکا چکے ہیں میرے احساسات بھی

تیرے ایوانوں میں گونجے ہیں مرے نغمات بھی

رشک شیراز کہن ہندوستاں کی آبرو

سر زمین حسن و موسیقی بہشت رنگ و بو

معبد حسن و محبت بارگاہ سوز و ساز

تیرے بت خانے حسیں تیرے کلیسا دل نواز

ذکر یوسف کا تو کیا کیجے تری سرکار میں

خود زلیخا آ کے بکتی ہے ترے بازار میں

جنتیں آباد ہیں تیرے در و دیوار میں

اور تو آباد خود شاعر کے قلب زار میں

محفل ساقی سلامت بزم انجم برقرار

نازنینان حرم پر رحمت پروردگار

یاد آئے گی مجھے بے طرح یاد آئے گی تو

عین وقت مے کشی آنکھوں میں پھر جائے گی تو

کیا کہوں کس شوق سے آیا تھا تیری بزم میں

چھوڑ کر خلد علی‌ گڑھ کی ہزاروں محفلیں

کتنے رنگیں عہد و پیماں توڑ کر آیا تھا میں

دل نوازان چمن کا چھوڑ کر آیا تھا میں

اک نشیمن میں نے چھوڑا اک نشیمن چھٹ گیا

ساز بس چھیڑا ہی تھا میں نے کہ گلشن چھٹ گیا

دل میں سوز غم کی اک دنیا لیے جاتا ہوں میں

آہ تیرے میکدے سے بے پیے جاتا ہوں میں

جاتے جاتے لیکن اک پیماں کئے جاتا ہوں میں

اپنے عزم سرفروشی کی قسم کھاتا ہوں میں

پھر تری بزم حسیں میں لوٹ کر آؤں گا میں

آؤں گا میں اور بہ انداز دگر آؤں گا میں

آہ وہ چکر دئے ہیں گردش ایام نے

کھول کر رکھ دی ہیں آنکھیں تلخیٔ آلام نے

فطرت دل دشمن نغمہ ہوئی جاتی ہے اب

زندگی اک برق اک شعلہ ہوئی جاتی ہے اب

سر سے پا تک ایک خونیں راگ بن کر آؤں گا

لالہ زار رنگ و بو میں آگ بن کر آؤں گا

rukhsat ai dilli tiri mahfil se ab jata hun main

nauha gir jata hun main nala ba lab jata hun main

yad aenge mujhe tere zamin-o-asman

rah chuke hain meri jaulan gah tere bostan

tera dil dharka chuke hain mere ehsasat bhi

tere aiwanon mein gunje hain mire naghmat bhi

rashk-e-shiraz-e-kuhan hindostan ki abru

sar zamin-e-husn-o-mausiqi bahisht-e-rang-o-bu

maabad-e-husn-o-mohabbat bargah-e-soz-o-saz

tere but khane hasin tere kalisa dil nawaz

zikr yusuf ka to kya kije tiri sarkar mein

khud zulekha a ke bikti hai tire bazar mein

jannaten abad hain tere dar-o-diwar mein

aur to abad khud shayar ke qalb-e-zar mein

mahfil saqi salamat bazm-e-anjum barqarar

nazninan-e-haram par rahmat parwardigar

yad aegi mujhe be tarah yad aegi to

ain waqt-e-mai kashi ankhon mein phir jaegi to

kya kahun kis shauq se aya tha teri bazm mein

chhor kar khuld-e-ali garh ki hazaron mahfilen

kitne rangin ahd-o-paiman tor kar aya tha main

dil nawazan-e-chaman ka chhor kar aya tha main

ik nasheman main ne chhora ik nasheman chhut gaya

saz bas chhera hi tha main ne ke gulshan chhut gaya

dil mein soz-e-gham ki ik duniya liye jata hun main

ah tere maikade se be piye jata hun main

jate jate lekin ik paiman kiye jata hun main

apne azm-e-sarfaroshi ki qasam khata hun main

phir tiri bazm-e-hasin mein laut kar aunga mein

aunga mein aur ba andaz-e-digar aunga mein

ah wo chakkar diye hain gardish-e-ayyam ne

khol kar rakh di hain ankhen talkhi-e-alam ne

fitrat-e-dil dushman-e-naghma hui jati hai ab

zindagi ik barq ik shola hui jati hai ab

sar se pa tak ek khunin rag ban kar aunga

lala zar-e-rang-o-bu mein ag ban kar aunga