دن کی آہیں نہ گئیں رات کے نالے نہ گئے

دن کی آہیں نہ گئیں رات کے نالے نہ گئے

میرے دل سوز مرے چاہنے والے نہ گئے

اپنے ماتھے کی شکن تم سے مٹائی نہ گئی

اپنی تقدیر کے بل ہم سے نکالے نہ گئے

تذکرہ سوز محبت کا کیا تھا اک بار

تا دم مرگ زباں سے مری چھالے نہ گئے

شمع رو ہو کے فقط تم نے جلانا سیکھا

میرے غم میں کبھی دو اشک نکالے نہ گئے

آج تک ساتھ ہیں سرکار جنوں کے تحفے

سر کا چکر نہ گیا پاؤں کے چھالے نہ گئے

وہ بھلا پیچ نکالیں گے مری قسمت کے

اپنے بالوں کے تو بل ان سے نکالے نہ گئے

کوئی شب ایسی نہ گزری کہ بنا کر گیسو

سیکڑوں بل مری تقدیر میں ڈالے نہ گئے

ہم سفر ایسے وفادار کہاں ملتے ہیں

تیرے وحشی کے قدم چھوڑ کے چھالے نہ گئے

اپنا دیوان مرقع ہے حسینوں کا جلیلؔ

نکتہ چیں تھک گئے کچھ عیب نکالے نہ گئے

din ki ahen na gain rat ke nale na gae

mere dil soz mire chahne wale na gae

apne mathe ki shikan tum se mitai na gai

apni taqdir ke bal ham se nikale na gae

tazkira soz-e-mohabbat ka kya tha ik bar

ta dam-e-marg zaban se miri chhale na gae

shama ro ho ke faqat tum ne jalana sikha

mere gham mein kabhi do ashk nikale na gae

aj tak sath hain sarkar junun ke tohfe

sar ka chakkar na gaya paon ke chhale na gae

wo bhala pech nikalenge miri qismat ke

apne balon ke to bal un se nikale na gae

koi shab aisi na guzri ke bana kar gesu

saikron bal miri taqdir mein dale na gae

ham safar aise wafadar kahan milte hain

tere wahshi ke qadam chhor ke chhale na gae

apna diwan muraqqaa hai hasinon ka jalil

nukta chin thak gae kuchh aib nikale na gae