دل ہے روشن کہ ہے دل میں رخ روشن ان کا

دل ہے روشن کہ ہے دل میں رخ روشن ان کا

زیر فانوس بدن شمع ہے جوبن ان کا

دید ان کی ہے وصال ان کا تصور ان کا

جان ان کی ہے جگر ان کا ہے تن من ان کا

ہیں وہ کاشانۂ دل میں کبھی آنکھوں میں کبھی

خانہ تن ہے مرا گھر بھی اور آنگن ان کا

ہے تصور جو انہیں کا تو وہ ہیں پیش نگاہ

ہو خیال ان کے سوا گر تو ہے رہزن ان کا

ہیں تمہیں میں وہ تم اپنے کو تو دیکھو ہو کون

جن کو کہتے ہو کہ ہے عرش پہ مسکن ان کا

جان ان کی ہے ہر اک جان کہاں پر وہ نہیں

دونوں عالم میں یہی رمز ہے مزمن ان کا

بیٹھے بیٹھے وہ کیا کرتے ہیں ہر گل پہ نظر

دل عاشق ہے مگر سیر کا گلشن ان کا

وہ ہمارے ہیں ہم ان کے ہیں انہیں کا یہ ظہور

جان ان کی ہے یہی جان بھی تن من ان کا

آ کے گھر میں مرے مرداںؔ نہ وہ جانے پائیں

تا قیامت نہ چھٹے ہاتھ سے دامن ان کا

dil hai raushan ke hai dil mein rukh-e-raushan un ka

zer-e-fanus badan shama hai joban un ka

did un ki hai wisal un ka tasawwur un ka

jan un ki hai jigar un ka hai tan man un ka

hain wo kashana-e-dil mein kabhi ankhon mein kabhi

khana tan hai mira ghar bhi aur angan un ka

hai tasawwur jo unhen ka to wo hain pesh-e-nigah

ho khayal un ke siwa gar to hai rahzan un ka

hain tumhen main wo tum apne ko to dekho ho kaun

jin ko kahte ho ke hai arsh pe maskan un ka

jan un ki hai har ik jan kahan par wo nahin

donon alam mein yahi ramz hai muzmin un ka

baithe baithe wo kiya karte hain har gul pe nazar

dil-e-ashiq hai magar sair ka gulshan un ka

wo hamare hain ham un ke hain unhen ka ye zuhur

jan un ki hai yahi jan bhi tan man un ka

a ke ghar mein mire mardan na wo jane paen

ta qayamat na chhute hath se daman un ka