دل کے زخموں سے چمن میں شور برپا کر دیا

دل کے زخموں سے چمن میں شور برپا کر دیا

میں نے پھولوں میں ہنسی کا تیری چرچا کر دیا

اپنی وحشت اپنی بدنامی کا مجھ کو غم نہیں

اس کا رونا ہے کہ میں نے تجھ کو رسوا کر دیا

پھر مریض غم نہ بولا دیکھ کر ظالم تجھے

آنکھوں ہی آنکھوں میں یہ کیا کہہ دیا کیا کر دیا

سامنے تم آ گئے میں دل پکڑ کر رہ گیا

میری قسمت سے دوا نے درد پیدا کر دیا

ہائے اب کوئی ٹھکانا آرزوؤں کا نہیں

دل کی بستی لوٹ لی ظالم نے یہ کیا کر دیا

چاندنی کا رات اک دریا بنایا ماہ نے

موتیوں سے میں نے پر رو رو کے دریا کر دیا

میری میت پر وہ آیا سب ہوئے محو جمال

موت کو بھی میری ظالم نے تماشا کر دیا

اب شعاع حسن پر انوار ہے نظارہ سوز

تیری اس بے پردگی نے خود ہی پردہ کر دیا

دشت گردی کی بدولت چار تنکے چن لئے

آشیاں کا میری وحشت نے سہارا کر دیا

کیا صدا تھی سننے والے دل پکڑ کر رہ گئے

تیرے نالوں نے تو افسرؔ حشر برپا کر دیا

dil ke zakhmon se chaman mein shor barpa kar diya

main ne phulon mein hansi ka teri charcha kar diya

apni wahshat apni badnami ka mujh ko gham nahin

us ka rona hai ke main ne tujh ko ruswa kar diya

phir mariz-e-gham na bola dekh kar zalim tujhe

ankhon hi ankhon mein ye kya kah diya kya kar diya

samne tum a gae mein dil pakar kar rah gaya

meri qismat se dawa ne dard paida kar diya

hae ab koi thikana arzuon ka nahin

dil ki basti laut li zalim ne ye kya kar diya

chandni ka rat ik dariya banaya mah ne

motiyon se main ne par ro ro ke dariya kar diya

meri mayyat par wo aya sab hue mahw-e-jamal

maut ko bhi meri zalim ne tamasha kar diya

ab shua-e-husn par anwar hai nazzara soz

teri us be pardagi ne khud hi parda kar diya

dasht gardi ki badaulat char tinke chun liye

ashiyan ka meri wahshat ne sahara kar diya

kya sada thi sunne wale dil pakar kar rah gae

tere nalon ne to afsar hashr barpa kar diya