دل ہے مشتاق جدا آنکھ طلب گار جدا

دل ہے مشتاق جدا آنکھ طلب گار جدا

خواہش وصل جدا حسرت دیدار جدا

زاہدوں سے نہ بنی حشر کے دن بھی یارب

وہ کھڑے ہیں تری رحمت کے طلب گار جدا

جی جلانے کو ستانے کو مٹانے کو مجھے

وہ جدا غیر جدا چرخ ستم گار جدا

بجلیاں حضرت موسیٰ پہ گریں دو اک بار

شعلۂ شوق جدا شعلۂ دیدار جدا

ہو گئے وہ سحر وصل یہ کہہ کر رخصت

تجھ سے کرتا ہے مجھے چرخ ستم گار جدا

قتل کرتے ہی مجھے جلوہ نمائی بھی ہوئی

در پہ ہنگامہ الگ ہے پس دیوار جدا

زاہدوں کی تری رحمت پہ چڑھائی ہے الگ

ٹولیاں باندھ کر آئے ہیں گنہ گار جدا

وضع کا پاس بھی ہے بیخودؔ مے خوار ضرور

کاگ بوتل سے نہ کیجئے سر بازار جدا

dil hai mushtaq juda ankh talab gar juda

khwahish-e-wasl juda hasrat-e-didar juda

zahidon se na bani hashr ke din bhi yarab

wo khare hain tiri rahmat ke talab gar juda

ji jalane ko satane ko mitane ko mujhe

wo juda ghair juda charkh-e-sitam gar juda

bijliyan hazrat-e-musa pe giren do ik bar

shola-e-shauq juda shola-e-didar juda

ho gae wo sahar-e-wasl ye kah kar rukhsat

tujh se karta hai mujhe charkh-e-sitam gar juda

qatl karte hi mujhe jalwa numai bhi hui

dar pe hangama alag hai pas-e-diwar juda

zahidon ki tiri rahmat pe charhai hai alag

toliyan bandh kar ae hain gunah gar juda

waza ka pas bhi hai bekhud mai khwar zarur

kag botal se na kijiye sar-e-bazar juda