دل ہے اپنا رنج فرقت میں شریک

دل ہے اپنا رنج فرقت میں شریک

خود اذیت خود اذیت میں شریک

ہے غم عشق اپنی قسمت میں شریک

ہے یہی ہر ایک حالت میں شریک

یاد ہے تیری ہر آفت میں شریک

کون ہوتا ہے مصیبت میں شریک

اب تو دل کے ساتھ میری جان بھی

ہو گئی تیری محبت میں شریک

حسن کامل کا کمال عشق دیکھ

کس کو وہ کرتا محبت میں شریک

ننگ آقائی ہے میری بندگی

آپ کیوں ہوں میری ذلت میں شریک

غیر پھر وہ حکم دے میرے خلاف

کیا یہ ہے تیری حکومت میں شریک

حسن نے راغبؔ خود اپنے عشق کو

کر دیا ہر دل کی رغبت میں شریک

dil hai apna ranj-e-furqat mein sharik

khud aziyyat khud aziyyat mein sharik

hai gham-e-ishq apni qismat mein sharik

hai yahi har ek halat mein sharik

yad hai teri har afat mein sharik

kaun hota hai musibat mein sharik

ab to dil ke sath meri jan bhi

ho gai teri mohabbat mein sharik

husn-e-kamil ka kamal-e-ishq dekh

kis ko wo karta mohabbat mein sharik

nang-e-aqai hai meri bandagi

ap kyun hun meri zillat mein sharik

ghair phir wo hukm de mere khilaf

kya ye hai teri hukumat mein sharik

husn ne raghib khud apne ishq ko

kar diya har dil ki raghbat mein sharik