دل ہمارا جانب زلف سیہ فام آئے گا

دل ہمارا جانب زلف سیہ فام آئے گا

یہ مسافر آج منزل پر سر شام آئے گا

گو برا ہے دل مگر رہنے دیا ہے اس لئے

عشق کی خوگر طبیعت ہے کبھی کام آئے گا

عشق دل کامل نہیں دیکھو ابھی کھولو نہ زلف

صید جب شہباز ہے کیوں کر نہ تہہ دام آئے گا

قاصد مرگ آئے یا آئے تمہارا نامہ بر

کہہ رہا ہے دل کہ کوئی آج پیغام آئے گا

جام غوطہ کر کے کوثر سے منگائی ہے شراب

مجھ کو فرماتے ہیں وہ پابند اسلام آئے گا

نیک ناموں کا ہو مجمع بزم ہو آراستہ

آپ خوش ہوں یا خفا ہوں ایک بدنام آئے گا

تم نہا لو جلد ورنہ رشک سے مر جاؤں گا

دم میں اب سایہ سر دیوار حمام آئے گا

دونوں آنکھیں دل جگر ہیں عشق ہونے میں شریک

یہ تو سب اچھے رہیں گے مجھ پر الزام آئے گا

ترک کر دو شاعری کو عقل رکھتے ہو رشیدؔ

ہو چکے ہو پیر اب کیا تم کو یہ کام آئے گا

dil hamara janib-e-zulf-e-siyah fam aega

ye musafir aj manzil par sar-e-sham aega

go bura hai dil magar rahne diya hai is liye

ishq ki khugar tabiat hai kabhi kam aega

ishq dil kamil nahin dekho abhi kholo na zulf

said jab shahbaz hai kyun kar na tah dam aega

qasid-e-marg ae ya ae tumhara nama bar

kah raha hai dil ke koi aj paigham aega

jam-e-ghauta kar ke kausar se mangai hai sharab

mujh ko farmate hain wo paband-e-islam aega

nek namon ka ho majmaa bazm ho arasta

ap khush hun ya khafa hun ek badnam aega

tum naha lo jald warna rashk se mar jaunga

dam mein ab saya sar-e-diwar hammam aega

donon ankhen dil jigar hain ishq hone mein sharik

ye to sab achchhe rahenge mujh par ilzam aega

tark kar do shayari ko aql rakhte ho rashid

ho chuke ho pir ab kya tum ko ye kam aega