بات ساقی کی نہ ٹالی جائے گی

بات ساقی کی نہ ٹالی جائے گی

کر کے توبہ توڑ ڈالی جائے گی

وہ سنورتے ہیں مجھے اس کی ہے فکر

آرزو کس کی نکالی جائے گی

دل لیا پہلی نظر میں آپ نے

اب ادا کوئی نہ خالی جائے گی

آتے آتے آئے گا ان کو خیال

جاتے جاتے بے خیالی جائے گی

کیا کہوں دل توڑتے ہیں کس لیے

آرزو شاید نکالی جائے گی

گرمئ نظارہ بازی کا ہے شوق

باغ سے نرگس نکالی جائے گی

دیکھتے ہیں غور سے میری شبیہ

شاید اس میں جان ڈالی جائے گی

اے تمنا تجھ کو رو لوں شام وصل

آج تو دل سے نکالی جائے گی

فصل گل آئی جنوں اچھلا جلیلؔ

اب طبیعت کچھ سنبھالی جائے گی

bat saqi ki na tali jaegi

kar ke tauba tor dali jaegi

wo sanwarte hain mujhe us ki hai fikr

arzu kis ki nikali jaegi

dil liya pahli nazar mein ap ne

ab ada koi na khali jaegi

ate ate aega un ko khayal

jate jate be khayali jaegi

kya kahun dil torte hain kis liye

arzu shayad nikali jaegi

garmi-e-nazzara bazi ka hai shauq

bagh se nargis nikali jaegi

dekhte hain ghaur se meri shabih

shayad is mein jan dali jaegi

ai tamanna tujh ko ro lun sham-e-wasl

aj to dil se nikali jaegi

fasl-e-gul ai junun uchhla jalil

ab tabiat kuchh sambhali jaegi