دل کے معمورے کی مت کر فکر فرصت چاہیے

دل کے معمورے کی مت کر فکر فرصت چاہیے

ایسے ویرانے کے اب بسنے کو مدت چاہیے

عشق و مے خواری نبھے ہے کوئی درویشی کے بیچ

اس طرح کے خرج لا حاصل کو دولت چاہیے

عاقبت فرہاد مر کر کام اپنا کر گیا

آدمی ہووے کسی پیشہ میں جرأت چاہیے

ہو طرف مجھ پہلواں شاعر کا کب عاجز سخن

سامنے ہونے کو صاحب فن کے قدرت چاہیے

عشق میں وصل و جدائی سے نہیں کچھ گفتگو

قرب و بعد اس جا برابر ہے محبت چاہیے

نازکی کو عشق میں کیا دخل ہے اے بوالہوس

یاں صعوبت کھینچنے کو جی میں طاقت چاہیے

تنگ مت ہو ابتداے عاشقی میں اس قدر

خیریت ہے میرؔ صاحب دل سلامت چاہیے

dil ke mamure ki mat kar fikr-e-fursat chahiye

aise wirane ke ab basne ko muddat chahiye

ishq-o-mai khwari nibhe hai koi darweshi ke bich

is tarah ke kharj la hasil ko daulat chahiye

aqibat farhad mar kar kam apna kar gaya

admi howe kisi pesha mein jurat chahiye

ho taraf mujh pahlwan shayar ka kab ajiz sukhan

samne hone ko sahab fan ke qudrat chahiye

ishq mein wasl-o-judai se nahin kuchh guftugu

qurb-o-baad is ja barabar hai mohabbat chahiye

nazuki ko ishq mein kya dakhl hai ai bawalhos

yan suubat khinchne ko ji mein taqat chahiye

tang mat ho ibtida-e-ashiqi mein is qadar

khairiyat hai mir sahab-e-dil salamat chahiye