Arooz is now on the App Store, for iPhone and iPad. Download →

All poetry

دل گئے آفت آئی جانوں پر

Mir Taqi Mir (1723–1810)

دل گئے آفت آئی جانوں پر

یہ فسانہ رہا زبانوں پر

عشق میں ہوش و صبر سنتے تھے

رکھ گئے ہاتھ سو تو کانوں پر

گرچہ انسان ہیں زمیں سے ولے

ہیں دماغ ان کے آسمانوں پر

شہر کے شوخ سادہ رو لڑکے

ظلم کرتے ہیں کیا جوانوں پر

عرش و دل دونوں کا ہے پایہ بلند

سیر رہتی ہے ان مکانوں پر

جب سے بازار میں ہے تجھ سی متاع

بھیڑ ہی رہتی ہے دکانوں پر

لوگ سر دینے جاتے ہیں کب سے

یار کے پاؤں کے نشانوں پر

کجی اوباش کی ہے وہ دربند

ڈالے پھرتا ہے بند شانوں پر

کوئی بولا نہ قتل میں میرے

مہر کی تھی مگر دہانوں پر

یاد میں اس کے ساق سیمیں کی

دے دے ماروں ہوں ہاتھ رانوں پر

تھے زمانے میں خرچی جن کی روپے

پھانسا کرتے ہیں ان کو آنوں پر

غم و غصہ ہے حصے میں میرے

اب معیشت ہے ان ہی کھانوں پر

قصے دنیا میں میرؔ بہت سنے

نہ رکھو گوش ان فسانوں پر