دلبر سے درد دل نہ کہوں ہائے کب تلک — تاباں عبد الحی (Taban Abdul Hai)

دلبر سے درد دل نہ کہوں ہائے کب تلک

خاموش اس کے غم میں رہوں ہائے کب تلک

اس شوخ سے جدا میں رہوں ہائے کب تلک

یہ ظلم یہ ستم میں سہوں ہائے کب تلک

رہتا ہے روز ہجر میں ظالم کے غم مجھے

اس دکھ سے دیکھیے کہ چھٹوں ہائے کب تلک

آئی بہار جائیے صحرا میں شہر چھوڑ

مج کو جنوں ہے گھر میں رہوں ہائے کب تلک

ظالم کو ٹک بھی رحم مرے حال پر نہیں

تاباںؔ میں اس کے جور سہوں ہائے کب تلک