دل ہوا ہے مرا خراب‌ سخن

دل ہوا ہے مرا خراب‌ سخن

دیکھ کر حسن بے حجاب سخن

بزم معنی میں سر خوشی ہے اسے

جس کوں ہے نشۂ شراب سخن

راہ مضمون تازہ بند نہیں

تا قیامت کھلا ہے باب سخن

جلوہ پیرا ہو شاہد معنی

جب زباں سوں اٹھے نقاب سخن

گوہر اس کی نظر میں جا نہ کرے

جن نے دیکھا ہے آب و تاب سخن

ہرجا‌ گویاں کی بات کیونکہ سنے

جو سنا نغمۂ رباب سخن

ہے تری بات اے نزاکت فہم

لوح دیباچۂ کتاب سخن

ہے سخن جگ منیں عدیم المثال

جز سخن نیں دجا جواب سخن

اے ولیؔ درد سر کبھو نہ رہے

جب ملے صندل و گلاب سخن

dil hua hai mira kharab-e-sukhan

dekh kar husn-e-be hijab sukhan

bazm-e-maani mein sar khushi hai use

jis kun hai nasha-e-sharab-e-sukhan

rah-e-mazmun taza band nahin

ta qayamat khula hai bab-e-sukhan

jalwa paira ho shahid-e-maani

jab zaban sun uthe naqab-e-sukhan

gauhar us ki nazar mein ja na kare

jin ne dekha hai ab-o-tab-e-sukhan

harja goyan ki bat kyunke sune

jo suna naghma-e-rabab-e-sukhan

hai tiri bat ai nazakat fahm

lauh-e-dibacha-e-kitab-e-sukhan

hai sukhan jag manen adim almisal

juz sukhan nain daja jawab-e-sukhan

ai wali dard-e-sar kabhu na rahe

jab mile sandal-o-gulab-e-sukhan