باتوں باتوں میں کیا خوں آج اک دلگیر کا

باتوں باتوں میں کیا خوں آج اک دلگیر کا

واہ کیا کہنا تری رنگینیٔ تقریر کا

بے سبب کب ہے تڑپنا عاشق دلگیر کا

سینے سے پیکاں نکلتا ہے تمہارے تیر کا

نو گرفتاروں کی وحشت کا بھی ہو کچھ امتحاں

آج سننا چاہیے نالہ نئی زنجیر کا

باعث حیرت ہوا بیماری دل کا اثر

دیکھو اب تو رنگ اڑتا ہے مری تصویر کا

بس بس اے ظالم کہاں تک امتحان ضبط آہ

اب تو دم گھٹنے لگا ہے عاشق دلگیر کا

مر گیا ہے آپ کا وحشی اداسی چھائی ہے

دیدنی ہے آج عالم خانۂ زنجیر کا

دل بھی دھڑکا آپ کا زلفیں بھی بل کھانے لگیں

اور ابھی زنداں میں نالہ ہے مری زنجیر کا

baton baton mein kiya khun aj ik dilgir ka

wah kya kahna tiri rangini-e-taqrir ka

be sabab kab hai tarapna ashiq-e-dilgir ka

sine se paikan nikalta hai tumhare tir ka

nau giraftaron ki wahshat ka bhi ho kuchh imtihan

aj sunna chahiye nala nai zanjir ka

bais-e-hairat hua bimari-e-dil ka asar

dekho ab to rang urta hai miri taswir ka

bas bas ai zalim kahan tak imtihan-e-zabt ah

ab to dam ghatne laga hai ashiq-e-dilgir ka

mar gaya hai ap ka wahshi udasi chhai hai

didani hai aj alam khana-e-zanjir ka

dil bhi dharka ap ka zulfen bhi bal khane lagen

aur abhi zindan mein nala hai miri zanjir ka