دل کو پیری میں محبت کا تری جوش آیا

دل کو پیری میں محبت کا تری جوش آیا

بے خودی شب کو رہی وقت سحر ہوش آیا

تیرے جلوے کا نظارہ نہ ہوا بار دگر

بے خودی کے ہیں یہ معنی کہ نہ پھر ہوش آیا

زہر گیسو نے مجھے مار ہی ڈالا تھا مگر

لب جاں بخش کے صدقہ میں مجھے ہوش آیا

ساقیا مے کدۂ دہر میں وہ مے کش ہوں

مرتے دم تک مجھے اپنا بھی نہ کچھ ہوش آیا

کس لئے جام‌ و صراحی میں ہے ساقی تاخیر

ابر پر شور پئے خاطر مے نوش آیا

دل کو پھر لالہ رخوں سے ہوئی الفت پیدا

عہد پیری میں جوانی کا مجھے جوش آیا

اس قدر شوق شہادت ہے مجھے اے قاتل

تیرے کوچے میں جو آیا تو کفن پوش آیا

جو دہر دہر سے وہ بار گنہ لے کے گیا

گو جب آیا تھا عدم سے تو سبک دوش آیا

خلعتیں زیر زمیں کون پنہا دیتا ہے

باغ عالم میں جو گل آیا قبا پوش آیا

واعظا کر سر منبر نہ مذمت مے کی

کچھ بنائے نہ بنے گی جو یہاں جوش آیا

حشر کے دن جو گنہ گاروں کی کثرت دیکھی

قلزم رحمت باری میں عجب جوش آیا

جس نے مے خانہ دنیا میں ذرا بھی پی لی

آ گئی موت پہ طالبؔ نہ اسے ہوش آیا

dil ko piri mein mohabbat ka tiri josh aya

be khudi shab ko rahi waqt-e-sahar hosh aya

tere jalwe ka nazara na hua bar-e-digar

be khudi ke hain ye maani ke na phir hosh aya

zahr-e-gesu ne mujhe mar hi dala tha magar

lab-e-jan bakhsh ke sadqa mein mujhe hosh aya

saqiya mai kada-e-dahr mein wo mai kash hun

marte dam tak mujhe apna bhi na kuchh hosh aya

kis liye jam-o-surahi mein hai saqi takhir

abr pur shor piye khatir-e-mai nosh aya

dil ko phir lala rukhon se hui ulfat paida

ahd-e-piri mein jawani ka mujhe josh aya

is qadar shauq-e-shahadat hai mujhe ai qatil

tere kuche mein jo aya to kafan posh aya

jo dahr dahr se wo bar-e-gunah le ke gaya

go jab aya tha adam se to subuk dosh aya

khilaten zer-e-zamin kaun panha deta hai

bagh-e-alam mein jo gul aya qaba posh aya

waza kar sar-e-mimbar na mazammat mai ki

kuchh banae na banegi jo yahan josh aya

hashr ke din jo gunah garon ki kasrat dekhi

qulzum-e-rahmat-e-bari mein ajab josh aya

jis ne mai khana duniya mein zara bhi pi li

a gai maut pe talib na use hosh aya