Arooz is now on the App Store, for iPhone and iPad. Download →

All poetry

دل کو صبر و قرار بھی نہ ہوا

Kaifi Kakorvi (1852–1928)

دل کو صبر و قرار بھی نہ ہوا

جبر پر اختیار بھی نہ ہوا

لالہ ہر چند باغ میں پھولا

گل رخوں میں شمار بھی نہ ہوا

مر مٹے فکر میں عروج کے ہم

خاک اونچا غبار بھی نہ ہوا

رہ گیا تیر یار پہلو میں

کیا ستم ہے کہ پار بھی نہ ہوا

خون سے میرے دامن قاتل

تختہ لالہ زار بھی نہ ہوا

مے سے مجھ کو خمار بھی نہ ہوا

نشہ کیسا اتار بھی نہ ہوا

اثر چشم زار بھی نہ ہوا

صاف ان کا غبار بھی نہ ہوا

ایک بوسے کو تو گنا سو بار

گالیوں کا شمار بھی نہ ہوا

ان کی رسوائیوں کا پاس رہا

میں کبھی اشک بار بھی نہ ہوا

سرو نے سرکشی سے کیا پایا

شجر میوہ دار بھی نہ ہوا