دل کی تسکین کو کافی ہے پریشاں ہونا

دل کی تسکین کو کافی ہے پریشاں ہونا

ہے توکل بخدا بے سر و ساماں ہونا

یوں تو ہر دین میں ہے صاحب ایماں ہونا

ہم کو اک بت نے سکھایا ہے مسلماں ہونا

اے پری رو ترے دیوانے کا ایماں کیا ہے

اک نگاہ غلط انداز پہ قرباں ہونا

کور ہے چشم جسے دعویٔ بینائی ہے

شرط اول ہے جہاں دیدۂ حیراں ہونا

ہم سے رندان بلا نوش کا ہے شُرب مدام

درد آشام مے کلفت ہجراں ہونا

وقف تسلیم و رضا چاہئے دل عاشق کا

ساحرؔ آسان نہیں بندۂ جاناں ہونا

dil ki taskin ko kafi hai pareshan hona

hai tawakkul bakhuda be sar-o-saman hona

yun to har din mein hai sahab-e-iman hona

ham ko ik but ne sikhaya hai musalman hona

ai pari ru tire diwane ka iman kya hai

ik nigah-e-ghalat andaz pe qurban hona

kor hai chashm jise daawa-e-binai hai

shart-e-awwal hai jahan dida-e-hairan hona

ham se rindan-e-bala nosh ka hai shurb-e-mudam

dard asham mai kulfat-e-hijran hona

waqf-e-taslim-o-raza chahiye dil ashiq ka

sahir asan nahin banda-e-janan hona