دل کا گلہ فلک کی شکایت یہاں نہیں

دل کا گلہ فلک کی شکایت یہاں نہیں

وہ مہرباں نہیں تو کوئی مہرباں نہیں

ہم آج تک چھپاتے ہیں یاروں سے راز عشق

حالانکہ دشمنوں سے یہ قصہ نہاں نہیں

زیبا نہیں ہے دوست سے کرنا معاملہ

کچھ ورنہ ناز جان کے بدلے گراں نہیں

ہم زمرۂ رقیب میں مل کر وہاں گئے

جب شوق رہ نما ہو کوئی پاسباں نہیں

آشفتہ مثل باد ہوں بیتاب مثل برق

کیونکر معین چرخ تری شوخیاں نہیں

ہم آپ پر نثار کریں کائنات کو

پر کیا کریں بساط میں جز نیم جاں نہیں

سامان وجد فتنۂ محشر کو دے دیا

وہ خاک پر ہماری جو دامن کشاں نہیں

کیوں ہیں ندیم دوست سفارش میں غیر کی

کیا ہم کو ان سے رسم و رہ ارمغاں نہیں

اک حال خوش میں بھول گئے کائنات کو

اب ہم وہاں ہیں مطرب و ساقی جہاں نہیں

کس کس پہ رشک کیجیے کس کس کو روئیے

کس دن وہ جلوہ آفت صدخانماں نہیں

کیوں یہ ہجوم شور و شغب ہے نشور میں

ایسا تو شیفتہؔ ہمیں خواب گراں نہیں

dil ka gila falak ki shikayat yahan nahin

wo mehrban nahin to koi mehrban nahin

ham aj tak chhupate hain yaron se raz-e-ishq

halanke dushmanon se ye qissa nihan nahin

zeba nahin hai dost se karna muamla

kuchh warna naz jan ke badle giran nahin

ham zumra-e-raqib mein mil kar wahan gae

jab shauq-e-rah numa ho koi pasban nahin

ashufta misl-e-bad hun betab misl-e-barq

kyunkar muin charkh tiri shokhiyan nahin

ham ap par nisar karen kainat ko

par kya karen bisat mein juz nim jan nahin

saman-e-wajd-e-fitna-e-mahshar ko de diya

wo khak par hamari jo daman kashan nahin

kyun hain nadim-e-dost sifarish mein ghair ki

kya ham ko un se rasm-o-rah-e-armughan nahin

ik hal-e-khush mein bhul gae kainat ko

ab ham wahan hain mutrib-o-saqi jahan nahin

kis kis pe rashk kijiye kis kis ko roiye

kis din wo jalwa afat-e-sadkhanuman nahin

kyun ye hujum-e-shor-o-shaghab hai nushur mein

aisa to shefta hamen khwab-e-giran nahin