دل کا معاملہ نگۂ آشنا کے ساتھ

دل کا معاملہ نگۂ آشنا کے ساتھ

ایسے ہے جیسے رابطۂ گل صبا کے ساتھ

دیکھو تو پیچ و تاب کی صورت کہ مل گئی

شام فراق بھی تری زلف دوتا کے ساتھ

یہ کیا بہار ہے کہ دکھائی گئی مجھے

شعلوں کی آنچ بھی گل رنگیں قبا کے ساتھ

یہ کیا طلسم ہے کہ سنایا گیا مجھے

ساز شکست دل تری آواز پا کے ساتھ

اے دوستو یہی ہے قیامت کی روز حشر

ہم بھی جگائے جائیں گے خلق خدا کے ساتھ

گلشن میں آئی پیرہن رنگ بن گئی

وہ موج خوں کہ چہرہ کشا تھی حنا کے ساتھ

عابدؔ بیان جلوۂ ناگاہ کیا کروں

خوبی ادا کے ساتھ ہے شوخی حیا کے ساتھ

dil ka muamla nigah-e-ashna ke sath

aise hai jaise rabta-e-gul saba ke sath

dekho to pech-o-tab ki surat ke mil gai

sham-e-firaq bhi tiri zulf-e-duta ke sath

ye kya bahar hai ke dikhai gai mujhe

sholon ki anch bhi gul-e-rangin qaba ke sath

ye kya tilism hai ke sunaya gaya mujhe

saz-e-shikast-e-dil tiri awaz-e-pa ke sath

ai dosto yahi hai qayamat ki roz-e-hashr

ham bhi jagae jaenge khalq-e-khuda ke sath

gulshan mein ai pairahan-e-rang ban gai

wo mauj-e-khun ke chehra kusha thi hina ke sath

abid bayan-e-jalwa-e-nagah kya karun

khubi ada ke sath hai shokhi haya ke sath