دل میں ہجوم شوق و تمنا لیے ہوئے
منیر بھوپالیدل میں ہجوم شوق و تمنا لیے ہوئے
جاتا ہوں تیری بزم سے کیا کیا لیے ہوئے
نیرنگیٔ جمال ہے جلوہ گہہ خیال
اس دل میں ہوں میں حسن کی دنیا لیے ہوئے
امید زیست اس کو ہو کیا جس کے واسطے
آئے پیام موت مسیحا لیے ہوئے
وہ جلوہ گاہ ناز ہو اور چشم شوق میں
ہوں کس قدر میں دل میں تمنا لیے ہوئے
یہ مسکرا کے کس نے نظر دل پہ ڈال دی
ہر ہر تڑپ ہے شان تمنا لیے ہوئے
ارماں کی فکر کس کو تمنا کا ذکر کیا
دل خود ہے اک نظر کا سہارا لیے ہوئے
ڈرنے لگے ہیں اب وہ نظر سے مری منیرؔ
گویا سکوت بھی ہے تقاضا لیے ہوئے
dil mein hujum-e-shauq-o-tamanna liye hue
jata hun teri bazm se kya kya liye hue
nairangi-e-jamal hai jalwa gah khayal
is dil mein hun main husn ki duniya liye hue
ummid zist us ko ho kya jis ke waste
ae payam-e-maut masiha liye hue
wo jalwa gah-e-naz ho aur chashm-e-shauq mein
hun kis qadar mein dil mein tamanna liye hue
ye muskura ke kis ne nazar dil pe dal di
har har tarap hai shan-e-tamanna liye hue
arman ki fikr kis ko tamanna ka zikr kya
dil khud hai ik nazar ka sahara liye hue
darne lage hain ab wo nazar se miri munir
goya sukut bhi hai taqaza liye hue