دل ویراں بھی تھا مسکن کسی کا

دل ویراں بھی تھا مسکن کسی کا

اسی میں نور تھا روشن کسی کا

گڑھی ہے آرزو زندہ ہے حسرت

کسی کا گھر ہے دل مدفن کسی کا

بپا ہے شور محشر قتل گہہ میں

کسی کا ہاتھ ہے دامن کسی کا

دو عالم کو تہ و بالا نہ کر دے

بدلنا ناز ہے چتون کسی کا

گلستاں میں ذرا جا کر تو دیکھو

کسی کی خندگی شیون کسی کا

بھروسا چرخ پر اے دل نہ کرنا

ہوا کب دوست یہ پر فن کسی کا

چراغ عشق ہے آنسو سے روشن

کسی کا خون دل روغن کسی کا

تمنا شوق سے نگراں ہے اس میں

کسی کا زخم دل روزن کسی کا

جمیلہؔ دشت میں کہتی تھی رو کر

الٰہی دل نہ ہو دشمن کسی کا

dil-e-wiran bhi tha maskan kisi ka

isi mein nur tha raushan kisi ka

garhi hai arzu zinda hai hasrat

kisi ka ghar hai dil madfan kisi ka

bapa hai shor-e-mahshar qatl gah mein

kisi ka hath hai daman kisi ka

do alam ko tah-o-bala na kar de

badalna naz hai chitwan kisi ka

gulistan mein zara ja kar to dekho

kisi ki khandagi shewan kisi ka

bharosa charkh par ai dil na karna

hawa kab dost ye pur fan kisi ka

charagh-e-ishq hai ansu se raushan

kisi ka khun-e-dil roghan kisi ka

tamanna shauq se nigaran hai is mein

kisi ka zakhm-e-dil rauzan kisi ka

jamilahu dasht mein kahti thi ro kar

ilahi dil na ho dushman kisi ka