بات کا اپنی نہ جب پایا جواب

بات کا اپنی نہ جب پایا جواب

ہم یہ سمجھے وہ دہن ہے لا جواب

باتیں سنوائیں لب خاموش نے

ورنہ ہم دیتے اسے کیا کیا جواب

بے نشاں ہے وہ کمر شکل دہن

کون سی شے ہے نہیں جس کا جواب

سادہ کاغذ بھیجا نامہ کے عوض

واں سے آیا بھی تو صاف آیا جواب

پوچھتا گر اس کمر کا میں نشاں

غیب سے ملتا مجھے اس کا جواب

تم جو کچھ کہتے زبان تیغ سے

میں دہان زخم سے دیتا جواب

آج مجھ سے بات اگر کرتے نہیں

دیں گے یہ بت کل خدا کو کیا جواب

بے دہن وہ ہے تو میں ہوں بے زباں

یار کی صورت ہوں میں بھی لا جواب

کہہ کے اک مصرع مہ نو رہ گیا

ہو سکا کب بیت ابرو کا جواب

بات سیدھی کی جو تھا مذکور قد

ذکر ابرو میں دیا ٹیڑھا جواب

کیجیے کیا بات اس کج طبع سے

دے گا چرخ واژگوں الٹا جواب

باتیں کرتا ہے جو پردہ چھوڑ کر

مجھ کو دیتا ہے وہ در پردہ جواب

آ گیا اے وائے پیغام اجل

پر نہ قاصد لے کے کچھ آیا جواب

سن کے بیتیں میرے حاسد چپ رہے

اے وزیرؔ اپنا سخن ہے لا جواب

bat ka apni na jab paya jawab

ham ye samjhe wo dahan hai la jawab

baten sunwaen lab-e-khamosh ne

warna ham dete use kya kya jawab

be nishan hai wo kamar shakl-e-dahan

kaun si shai hai nahin jis ka jawab

sada kaghaz bheja nama ke ewaz

wan se aya bhi to saf aya jawab

puchhta gar is kamar ka main nishan

ghaib se milta mujhe us ka jawab

tum jo kuchh kahte zaban-e-tegh se

main dahan-e-zakhm se deta jawab

aj mujh se bat agar karte nahin

denge ye but kal khuda ko kya jawab

be dahan wo hai to main hun be zaban

yar ki surat hun main bhi la jawab

kah ke ik misra mah-e-nau rah gaya

ho saka kab bit abru ka jawab

bat sidhi ki jo tha mazkur qad

zikr-e-abru mein diya terha jawab

kijiye kya bat is kaj taba se

dega charkh-e-wazhgon ulta jawab

baten karta hai jo parda chhor kar

mujh ko deta hai wo dar parda jawab

a gaya ai wae paigham-e-ajal

par na qasid le ke kuchh aya jawab

sun ke baiten mere hasid chup rahe

ai wazir apna sukhan hai la jawab