دل میں کسی کے راہ کئے جا رہا ہوں میں

دل میں کسی کے راہ کئے جا رہا ہوں میں

کتنا حسیں گناہ کئے جا رہا ہوں میں

دنیائے دل تباہ کئے جا رہا ہوں میں

صرف نگاہ و آہ کئے جا رہا ہوں میں

فرد عمل سیاہ کئے جا رہا ہوں میں

رحمت کو بے پناہ کئے جا رہا ہوں میں

ایسی بھی اک نگاہ کئے جا رہا ہوں میں

ذروں کو مہر و ماہ کئے جا رہا ہوں میں

مجھ سے لگے ہیں عشق کی عظمت کو چار چاند

خود حسن کو گواہ کئے جا رہا ہوں میں

دفتر ہے ایک معنئ بے لفظ و صوت کا

سادہ سی جو نگاہ کئے جا رہا ہوں میں

آگے قدم بڑھائیں جنہیں سوجھتا نہیں

روشن چراغ راہ کئے جا رہا ہوں میں

معصومئ جمال کو بھی جن پہ رشک ہے

ایسے بھی کچھ گناہ کئے جا رہا ہوں میں

تنقید حسن مصلحت خاص عشق ہے

یہ جرم گاہ گاہ کئے جا رہا ہوں میں

اٹھتی نہیں ہے آنکھ مگر اس کے روبرو

نادیدہ اک نگاہ کئے جا رہا ہوں میں

گلشن پرست ہوں مجھے گل ہی نہیں عزیز

کانٹوں سے بھی نباہ کئے جا رہا ہوں میں

یوں زندگی گزار رہا ہوں ترے بغیر

جیسے کوئی گناہ کئے جا رہا ہوں میں

مجھ سے ادا ہوا ہے جگرؔ جستجو کا حق

ہر ذرے کو گواہ کئے جا رہا ہوں میں

dil mein kisi ke rah kiye ja raha hun main

kitna hasin gunah kiye ja raha hun main

duniya-e-dil tabah kiye ja raha hun main

sirf-e-nigah-o-ah kiye ja raha hun main

fard-e-amal siyah kiye ja raha hun main

rahmat ko be panah kiye ja raha hun main

aisi bhi ik nigah kiye ja raha hun main

zarron ko mehr-o-mah kiye ja raha hun main

mujh se lage hain ishq ki azmat ko char chand

khud husn ko gawah kiye ja raha hun main

daftar hai ek maani-e-be lafz-o-saut ka

sada si jo nigah kiye ja raha hun main

age qadam barhaen jinhen sujhta nahin

raushan charagh-e-rah kiye ja raha hun main

maasumi-e-jamal ko bhi jin pe rashk hai

aise bhi kuchh gunah kiye ja raha hun main

tanqid-e-husn-e-maslahat-e-khas ishq hai

ye jurm gah gah kiye ja raha hun main

uthti nahin hai ankh magar us ke rubaru

nadida ik nigah kiye ja raha hun main

gulshan parast hun mujhe gul hi nahin aziz

kanton se bhi nibah kiye ja raha hun main

yun zindagi guzar raha hun tire baghair

jaise koi gunah kiye ja raha hun main

mujh se ada hua hai jigar justuju ka haq

har zarre ko gawah kiye ja raha hun main