دل میں پوشیدہ تپ عشق بتاں رکھتے ہیں

دل میں پوشیدہ تپ عشق بتاں رکھتے ہیں

آگ ہم سنگ کی مانند نہاں رکھتے ہیں

تازگی ہے سخن کہنہ میں یہ بعد وفات

لوگ اکثر مرے جینے کا گماں رکھتے ہیں

بھا گئی کون سی وہ بات بتوں کی ورنہ

نہ کمر رکھتے ہیں کافر نہ دہاں رکھتے ہیں

مثل پروانہ نہیں کچھ زر و مال اپنے پاس

ہم فقط تم پہ فدا کرنے کو جاں رکھتے ہیں

محفل یار میں کچھ بات نہ نکلی منہ سے

کہنے کو شمع کی مانند زباں رکھتے ہیں

ہو گیا زرد پڑی جس کی حسینوں پہ نظر

یہ عجب گل ہیں کہ تاثیر خزاں رکھتے ہیں

عوض ملک جہاں ملک سخن ہے ناسخؔ

گو نہیں حکم رواں طبع رواں رکھتے ہیں

dil mein poshida tap-e-ishq-e-butan rakhte hain

ag ham sang ki manind-e-nihan rakhte hain

tazgi hai sukhan-e-kohna mein ye baad wafat

log aksar mire jine ka guman rakhte hain

bha gai kaun si wo bat buton ki warna

na kamar rakhte hain kafir na dahan rakhte hain

misl-e-parwana nahin kuchh zar-o-mal apne pas

ham faqat tum pe fida karne ko jan rakhte hain

mahfil-e-yar mein kuchh bat na nikli munh se

kahne ko shama ki manind zaban rakhte hain

ho gaya zard pari jis ki hasinon pe nazar

ye ajab gul hain ke tasir-e-khizan rakhte hain

ewaz-e-mulk jahan mulk-e-sukhan hai nasikh

go nahin hukm-e-rawan tab-e-rawan rakhte hain