Arooz is now on the App Store, for iPhone and iPad. Download →

All poetry

دل پر خوں ہے یہاں تجھ کو گماں ہے شیشہ

Mir Taqi Mir (1723–1810)

دل پر خوں ہے یہاں تجھ کو گماں ہے شیشہ

شیخ کیوں مست ہوا ہے تو کہاں ہے شیشہ

شیشہ بازی تو تنک دیکھنے آ آنکھوں کی

ہر پلک پر مرے اشکوں سے رواں ہے شیشہ

رو سفیدی ہے نقاب رخ شور مستی

ریش قاضی کے سبب پنبہ دہاں ہے شیشہ

منزل مستی کو پہنچے ہے انہیں سے عالم

نشۂ مے بلد و سنگ نشاں ے شیشہ

درمیاں حلقۂ مستاں کے شب اس کی جا تھی

دور ساغر میں مگر پیر مغاں ہے شیشہ

جا کے پوچھا جو میں یہ کارگہ مینا میں

دل کی صورت کا بھی اے شیشہ گراں ہے شیشہ

کہنے لاگے کہ کدھر پھرتا ہے بہکا اے مست

ہر طرح کا جو تو دیکھے ہے کہ یاں ہے شیشہ

دل ہی سارے تھے پہ اک وقت میں جو کر کے گداز

شکل شیشے کی بنائے ہیں کہاں ہے شیشہ

جھک گیا دیکھ کے میں میرؔ اسے مجلس میں

چشم بد دور طرحدار جواں ہے شیشہ