دل میں اس بانیٔ بیداد کے گھر ہونے دو
منشی شیو پرشاد وہبیدل میں اس بانیٔ بیداد کے گھر ہونے دو
رفتہ رفتہ مری آہوں کا اثر ہونے دو
اب تو وہ فرط محبت سے یہ فرماتے ہیں
گھر نہ جائیں گے جو ہوتی ہے سحر ہونے دو
شوق سے ہاتھوں میں مہندی ملو تم تو اپنے
خون ہوتا ہے اگر میرا جگر ہونے دو
زلف سرکاؤ ذرا عارض تاباں سے کبھی
چاندنی رات کو اے رشک قمر ہونے دو
سرد مہری سے نہ اک آن بھی باز آؤ تم
روح میری ہے اگر گرم سفر ہونے دو
مہر و الفت ہی میں اس طرح کے ہوتے ہیں کلام
روز ہوتا ہے اگر وصل میں شر ہونے دو
تیغ ابرو کے ابھی وار عبث کرتے ہو
تم مجھے بھی تو ذرا سینہ سپر ہونے دو
مدتوں سے وہ یوں ہی ٹالتے ہیں وعدۂ وصل
شام ہوتی ہے تو کہتے ہیں سحر ہونے دو
نہ کوئی فکر کسی طرح کرو تم وہبیؔ
عمر جس طرح سے ہوتی ہے بسر ہونے دو
dil mein is bani-e-bedad ke ghar hone do
rafta rafta miri ahon ka asar hone do
ab to wo fart-e-mohabbat se ye farmate hain
ghar na jaenge jo hoti hai sahar hone do
shauq se hathon mein mehndi milo tum to apne
khun hota hai agar mera jigar hone do
zulf sarkao zara ariz-e-taban se kabhi
chandni rat ko ai rashk-e-qamar hone do
sard mehri se na ik an bhi baz ao tum
ruh meri hai agar garm-e-safar hone do
mehr-o-ulfat hi mein is tarah ke hote hain kalam
roz hota hai agar wasl mein shar hone do
tegh-e-abru ke abhi war abas karte ho
tum mujhe bhi to zara sina sipar hone do
muddaton se wo yun hi talte hain waada-e-wasl
sham hoti hai to kahte hain sahar hone do
na koi fikr kisi tarah karo tum wobi
umr jis tarah se hoti hai basar hone do