دل مکدر ہے آئینہ رو کا

دل مکدر ہے آئینہ رو کا

نہ ملا رنگ سے پتا بو کا

ہے دم صبح وہ خماریں آنکھ

ایک ٹوٹا طلسم جادو کا

کم جو ٹھہرے جفا سے میری وفا

تو یہ پاسنگ ہے ترازو کا

دل کی بے چینیاں خدا کی پناہ

تکیہ ہٹ ہٹ گیا ہے پہلو کا

کہیں جاتی بہار رکتی ہے

دامن آیا نہ ہاتھ میں بو کا

ہے نئی قید اب یہ آزادی

زور ٹوٹا ہوا ہے بازو کا

آندھی آہوں کی سیل اشکوں کی

اب نہیں کوئی اپنے قابو کا

قہقہہ بھرتی ہے صراحی کیا

ظرف خم سے سوا ہے چلو کا

سوتی قسمت کی نیند اڑاوے گا

نرم تکیہ کسی کے زانو کا

عشق بازی ہے جان کی جوکھم

وہیں مارا پڑا جہاں چوکا

آرزوؔ دل ہے وقف بیم و امید

جھلملاتا چراغ جگنو کا

dil mukaddar hai aina ru ka

na mila rang se pata bu ka

hai dam-e-subh wo khumaren ankh

ek tuta tilism-e-jadu ka

kam jo thahre jafa se meri wafa

to ye pasang hai tarazu ka

dil ki be chiniyan khuda ki panah

takiya hat hat gaya hai pahlu ka

kahin jati bahar rukti hai

daman aya na hath mein bu ka

hai nai qaid ab ye azadi

zor tuta hua hai bazu ka

andhi ahon ki sail ashkon ki

ab nahin koi apne qabu ka

qahqaha bharti hai surahi kya

zarf-e-kham se siwa hai chalo ka

soti qismat ki nind urawega

narm takiya kisi ke zanu ka

ishq bazi hai jan ki jokham

wahin mara para jahan choka

arzu dil hai waqf-e-bim-o-umid

jhilmilata charagh jugnu ka