اے گل خوش رنگ گلزار شہادت السلام

اے گل خوش رنگ گلزار شہادت السلام

تیری مظلومی کی سب دیں گے شہادت السلام

جور دیکھے تونے کیا کیا لال سنگ جور سے

اے کہ گذری تیرے اوپر سخت حالت السلام

شام کے لوگوں نے تجھ کو یوں مکدر کردیا

اے مہ تابندۂ برج امامت السلام

کارواں در کارواں بار الم تجھ سے کھنچا

حوصلہ کس کا جو کھینچے یہ ملالت السلام

قامت دلکش ترا بے سر پڑا تھا خاک میں

کربلا میں تجھ پہ گذری ہے قیامت السلام

ہائے غیبت میں تری عالم سیہ سب ہوگیا

اے فروغ چہرۂ صبح سعادت السلام

تند باد ظلم نے تجھ کو دیا سا گل کیا

اے کہ تو تھا زیب ایوان رسالت السلام

کب عقیدے میں محبوں کے برابر ہوسکے

ایک سجدے سے ترے صدسالہ طاعت السلام

میرؔ کم گو کبریا تیری بیاں کب کرسکے

تو ہی اپنی جانے ہے قدر و جلالت السلام

ai gul-e-khush rang gulzar-e-shahadat alssalam

teri mazlumi ki sab denge shahadat alssalam

jaur dekhe tune kya kya lal sang-e-jaur se

ai ke guzari tere upar sakht halat alssalam

sham ke logon ne tujh ko yun mukaddar kardiya

ai mah-e-tabinda-e-biraj-e-imamat alssalam

karwan dar karwan bar-e-alam tujh se khincha

hausla kis ka jo khinche ye malalat alssalam

qamat-e-dilkash tira be sar para tha khak mein

karbala mein tujh pe guzari hai qayamat alssalam

hae ghibat mein tiri alam siyah sab hogaya

ai farogh-e-chehra-e-subh-e-saadat alssalam

tund bad-e-zulm ne tujh ko diya sa gul kiya

ai ke tu tha zeb-e-aiwan-e-risalat alssalam

kab aqide mein muhibon ke barabar hosake

ek sajde se tire sadsala taat alssalam

mir kam go kibriya teri bayan kab karsake

tu hi apni jane hai qadar-o-jalalat alssalam