دل میں اس شوخ کے جو راہ نہ کی

دل میں اس شوخ کے جو راہ نہ کی

ہم نے بھی جان دی پر آہ نہ کی

پردہ پوشی ضرور تھی اے چرخ

کیوں شب بوالہوس سیاہ نہ کی

تشنہ لب ایسے ہم گرے مے پر

کہ کبھی سیر عید گاہ نہ کی

اس کو دشمن سے کیا بچئے وہ چرخ

جس نے تدبیر خسف ماہ نہ کی

کون ایسا کہ اس سے پوچھے کیوں

پرسش حال داد خواہ نہ کی

تھا بہت شوق وصل تو نے تو

کمی اے حسن تابگاہ نہ کی

عشق میں کام کچھ نہیں آتا

گر نہ کی حرص و مال و جاہ نہ کی

تاب کم ظرف کو کہاں تم نے

دشمنی کی عدو سے چاہ نہ کی

میں بھی کچھ خوش نہیں وفا کر کے

تم نے اچھا کیا نباہ نہ کی

محتسب یہ ستم غریبوں پر

کبھی تنبیہ بادشاہ نہ کی

گریہ و آہ بے اثر دونوں

کس نے کشتی مری تباہ نہ کی

تھا مقدر میں اس سے کم ملنا

کیوں ملاقات گاہ گاہ نہ کی

دیکھ دشمن کو اٹھ گیا بے دید

میرے احوال پر نگاہ نہ کی

مومنؔ اس ذہن بے خطا پر حیف

فکر آمرزش گناہ نہ کی

dil mein us shokh ke jo rah na ki

ham ne bhi jan di par ah na ki

parda poshi zarur thi ai charkh

kyun shab-e-bawalhos siyah na ki

tishna lab aise ham gire mai par

ke kabhi sair-e-eid gah na ki

us ko dushman se kya bachiye wo charkh

jis ne tadbir khasaf-e-mah na ki

kaun aisa ke us se puchhe kyun

pursish-e-hal dad khwah na ki

tha bahut shauq-e-wasl tu ne to

kami ai husn tabgah na ki

ishq mein kam kuchh nahin ata

gar na ki hirs-o-mal-o-jah na ki

tab kam zarf ko kahan tum ne

dushmani ki adu se chah na ki

main bhi kuchh khush nahin wafa kar ke

tum ne achchha kiya nibah na ki

mohtasib ye sitam gharibon par

kabhi tambih badshah na ki

girya-o-ah be asar donon

kis ne kashti miri tabah na ki

tha muqaddar mein us se kam milna

kyun mulaqat gah gah na ki

dekh dushman ko uth gaya be did

mere ahwal par nigah na ki

momin is zehn be khata par haif

fikr amrzash gunah na ki