اے ہمدماں بھلاؤ نہ تم یاد رفتگاں — ولی اللہ محب (Waliullah Muhib)

اے ہمدماں بھلاؤ نہ تم یاد رفتگاں

واماندگاں کو ہے یہی ارشاد رفتگاں

جو غنچہ ناشگفتہ ہی جھڑ جائے شاخ سے

ہے اس چمن میں وہ دل ناشاد رفتگاں

چشم و دل و جگر کے لئے اشک درد و داغ

ہم پاس ہے یہ تحفۂ امداد رفتگاں

اس کارواں سرا میں یہ بانگ جرس نہیں

ہے یہ صدائے نالہ و فریاد رفتگاں

آسیدہ و روندہ سے پوچھا بہت محبؔ

دریافت پر نہ کچھ ہوئی روداد رفتگاں