دل لیا جس نے بے وفائی کی

دل لیا جس نے بے وفائی کی

رسم ہے کیا یہ دل ربائی کی

تذکرہ صلح غیر کا نہ کرو

بات اچھی نہیں لڑائی کی

تم کو اندیشۂ گرفتاری

یاں توقع نہیں رہائی کی

وصل میں کس طرح ہوں شادی مرگ

مجھ کو طاقت نہیں جدائی کی

دل نہ دینے کا ہم کو دعویٰ ہے

کس کو ہے لاف دل ربائی کی

ایک دن تیرے گھر میں آنا ہے

بخت و طالع نے گر رسائی کی

دل لگایا تو ناصحوں کو کیا

بات جو اپنے جی میں آئی کی

شیفتہؔ وہ کہ جس نے ساری عمر

دین داری و پارسائی کی

آخر کار مے پرست ہوا

شان ہے اس کی کبریائی کی

dil liya jis ne be wafai ki

rasm hai kya ye dil rabai ki

tazkira sulh ghair ka na karo

bat achchhi nahin larai ki

tum ko andesha-e-giraftari

yan tawaqqo nahin rihai ki

wasl mein kis tarah hun shadi-e-marg

mujh ko taqat nahin judai ki

dil na dene ka ham ko daawa hai

kis ko hai laf-e-dil rabai ki

ek din tere ghar mein ana hai

bakht-o-tale ne gar rasai ki

dil lagaya to nasihon ko kiya

bat jo apne ji mein ai ki

shefta wo ke jis ne sari umar

din dari-o-parsai ki

akhir kar-e-mai parast hua

shan hai us ki kibriyai ki