دل سے ہر دم ہمیں آواز لگا آتی ہے — دیا شنکر نسیم (Pandit Daya Shankar Naseem Lakhnawi)

دل سے ہر دم ہمیں آواز لگا آتی ہے

بند کانوں کو بھی گریہ کی صدا آتی ہے

دل سے ہے آنکھ تک آئی اثر گرمیٔ شوق

اشک حسرت سے نگہ آبلہ پا آتی ہے

گل ہوا کوئی چراغ سحری او بلبل

ہاتھ ملتی ہوئی پتوں سے صبا آتی ہے

تیری آنکھوں کا ہوں بیمار میں او عیسیٰ دم

نہ دعا آتی ہے مجھ کو نہ دوا آتی ہے

آئنہ صاف سکندر کو دکھایا تو نے

خوب اے خضر تجھے راہ بنا آتی ہے

چھو لیا دھوکے سے دامان صبا تو نے تو کیا

غنچۂ گل کہیں مٹھی میں ہوا آتی ہے

جس قدر وصل بتاں کا تمہیں رہتا ہے فراق

اے نسیمؔ اتنی کبھی یاد خدا آتی ہے