دل رقیب تو دیکھا مرا جگر دیکھیں — راجہ نوشاد علی خان

Arooz is now on the App Store, for iPhone and iPad. Download →

راجہ نوشاد علی خان

دل رقیب تو دیکھا مرا جگر دیکھیں

ادھر کے دیکھنے والے ذرا ادھر دیکھیں

کسی کے حسن پہ ہیں ایسی شیفتہ آنکھیں

پری جو سامنے آئے نہ ایک نظر دیکھیں

ابھی نہائے ہیں کپڑے بدلنے بیٹھے ہیں

مجال کیا ہے ہماری جو ہم ادھر دیکھیں

ہزاروں صورت موسیٰ ہیں طالب دیدار

جو ایک ہو تو وہ دیکھیں کدھر کدھر دیکھیں

ہمارے دل میں جو حسرت ہے جو تمنا ہے

نہ مانیں گے نہ سہی آج عرض کر دیکھیں

کوئی جگہ نہیں خالی ہے تیرے جلوے سے

کہاں کہاں تجھے دیکھیں کدھر کدھر دیکھیں

جو اضطرابئ دل کا نہ ہو یقین ان کو

ہماری طرح سے وہ بھی کسی پہ مر دیکھیں

رقیب آئنہ نوشادؔ اور دل نوشادؔ

وہ ایک دیکھنے والے کدھر کدھر دیکھیں