دل سے سمجھوں گا اسے دشمن جاں ہونے دو
Imdad Ali Bahr (1810–1878)دل سے سمجھوں گا اسے دشمن جاں ہونے دو
زہر گھولوں گا دوا میں خفقاں ہونے دو
آنکھ بھوں اس کے اشاروں پہ رواں ہونے دو
مل کے ابرو و مژہ تیر و کماں ہونے دو
میرے دل کو ہدف تیر نگہ کرتے ہیں
اور مجھ سے بھی اشارہ ہے کہ ہاں ہونے دو
آگ بھڑکی ہوئی ہے مجھ کو نہ سمجھائے کوئی
جان کا مال کا ہوتا ہے زیاں ہونے دو
ہر طرح ہم دل نا فہم کو سمجھا لیں گے
داغ موجود ہیں پہلو کو خزاں ہونے دو
اسم اعظم کا اثر غیر کو دکھلا دیں گے
یار کا نام ذرا ورد زباں ہونے دو
آنکھیں پھوٹیں بھی کہیں اس فلک بد بیں کی
ضبط اچھا نہیں آہوں کا دھواں ہونے دو
پردہ ڈالو مری آنکھوں پہ نہ اے شرم و حجاب
یار بے پردہ ہے مجھ کو نگراں ہونے دو
رات باقی ہے ابھی کس لیے گھبرا کے اٹھے
توپ چھٹنے دو مری جان اذاں ہونے دو
لکھنؤ میں تمہیں دکھلائیں گے چوکا بہتے
چار آنسو مری آنکھوں سے رواں ہونے دو
دیکھوں کیوں کر نہیں ہوتا فلک کج سیدھا
دل محزوں کی بلند آہ و فغاں ہونے دو
اہل دنیا میں مؤثر ہے ہر ایک شے کا رواج
مست ہو جائیں گے سب دور مغاں ہونے دو
نوجوانی کا مزا کوئی خرابات میں ہے
مردم پیر کو مشتاق جناں ہونے دو
آزمائش کے نظر ہی جو ہمارے جانب
پار سینے سے نگاہوں کی سناں ہونے دو
بحرؔ نے اب تو کمر باندھی ہی بد وضعی پر
اب نہ روکو اسے رسوائے جہاں ہونے دو
dil se samjhunga use dushman-e-jan hone do
zahr gholunga dawa mein khafqan hone do
ankh bhaun us ke isharon pe rawan hone do
mil ke abru-o-mizha-e-tir-o-kaman hone do
mere dil ko hadaf-e-tir-e-nigah karte hain
aur mujh se bhi ishara hai ke han hone do
ag bharki hui hai mujh ko na samjhae koi
jan ka mal ka hota hai ziyan hone do
har tarah ham dil na fahm ko samjha lenge
dagh maujud hain pahlu ko khizan hone do
ism-e-aazam ka asar ghair ko dikhla denge
yar ka nam zara wird-e-zaban hone do
ankhen phuten bhi kahin is falak-e-bad bin ki
zabt achchha nahin ahon ka dhuan hone do
parda dalo miri ankhon pe na ai sharm-o-hijab
yar be parda hai mujh ko nigaran hone do
rat baqi hai abhi kis liye ghabra ke uthe
top chhutne do miri jan-e-azan hone do
lakhnau mein tumhen dikhlaenge choka bahte
char ansu miri ankhon se rawan hone do
dekhun kyun kar nahin hota falak-e-kaj sidha
dil-e-mahzon ki buland ah-o-fughan hone do
ahl-e-duniya mein muossir hai har ek shai ka riwaj
mast ho jaenge sab daur-e-mughan hone do
naujawani ka maza koi kharabat mein hai
mardum-e-pir ko mushtaq janan hone do
azmaish ke nazar hi jo hamare janib
par sine se nigahon ki sinan hone do
bahr ne ab to kamar bandhi hi bad wazai par
ab na roko use riswae jahan hone do