باتیں نہ کس نے ہم کو کہیں تیرے واسطے

باتیں نہ کس نے ہم کو کہیں تیرے واسطے

اور ہم نے بھی نہ کس کی سہیں تیرے واسطے

حیران در بہ در پڑے پھرتے ہیں رات دن

خورشید و ماہ زہرہ جبیں تیرے واسطے

سیماب و برق و شعلۂ جوالہ اور یہ دل

بیتاب ان میں کون نہیں تیرے واسطے

ہم نے تری تلاش میں اے برق وش کیا

یاں ایک آسمان و زمیں تیرے واسطے

شب سوز غم سے شمع صفت بے قراریاں

کیا کیا نہ میرے دل کو رہیں تیرے واسطے

تو زیب بزم غیر رہا اور میں یہاں

بھٹکا پھرا کہیں کا کہیں تیرے واسطے

یہ نالے وہ ہیں یاد رہے تو نہ گر ملا

پہنچیں گے تابہ عرش بریں تیرے واسطے

کچھ اور اختلاف کا باعث نہیں فقط

عالم میں ہے چناں و چنیں تیرے واسطے

فضل خدا سے یاد رہے عیشؔ نعمتیں

موجود ہوں گی دیکھ یہیں تیرے واسطے

baten na kis ne ham ko kahin tere waste

aur ham ne bhi na kis ki sahen tere waste

hairan dar ba dar pare phirte hain rat din

khurshid-o-mah zohra jabin tere waste

simab-o-barq-o-shola-e-jawwala aur ye dil

betab un mein kaun nahin tere waste

ham ne tiri talash mein ai barq wash kiya

yan ek asman-o-zamin tere waste

shab soz-e-gham se shama sifat be qarariyan

kya kya na mere dil ko rahen tere waste

tu zeb bazm-e-ghair raha aur main yahan

bhatka phira kahin ka kahin tere waste

ye nale wo hain yad rahe to na gar mila

pahunchenge taba arsh-e-barin tere waste

kuchh aur ikhtilaf ka bais nahin faqat

alam mein hai chunan-o-chunen tere waste

fazl-e-khuda se yad rahe aish nematen

maujud hongi dekh yahin tere waste