Arooz is now on the App Store, for iPhone and iPad. Download →

All poetry

دل صاف ہو تو جلوہ گہہ یار کیوں نہ ہو

Mir Taqi Mir (1723–1810)

دل صاف ہو تو جلوہ گہہ یار کیوں نہ ہو

آئینہ ہو تو قابل دیدار کیوں نہ ہو

عالم تمام اس کا گرفتار کیوں نہ ہو

وہ ناز پیشہ ایک ہے عیار کیوں نہ ہو

مستغنیانہ تو جو کرے پہلے ہی سلوک

عاشق کو فکر عاقبت کار کیوں نہ ہو

رحمت غضب میں نسبت برق و سحاب ہے

جس کو شعور ہو تو گنہ گار کیوں نہ ہو

دشمن تو اک طرف کہ سبب رشک کا ہے یاں

در کا شگاف و رخنۂ دیوار کیوں نہ ہو

آیات حق ہیں سارے یہ ذرات کائنات

انکار تجھ کو ہووے سو اقرار کیوں نہ ہو

ہر دم کی تازہ مرگ جدائی سے تنگ ہوں

ہونا جو کچھ ہے آہ سو یک بار کیوں نہ ہو

موئے سفید ہم کو کہے ہے کہ غافلاں

اب صبح ہونے آئی ہے بیدار کیوں نہ ہو

نزدیک اپنے ہم نے تو سب کر رکھا ہے سہل

پھر میرؔ اس میں مردن دشوار کیوں نہ ہو