دل عشق کا ہمیشہ حریف نبرد تھا — میر تقی میر (Mir Taqi Mir)

دل عشق کا ہمیشہ حریف نبرد تھا

اب جس جگہ کہ داغ ہے یاں آگے درد تھا

اک گرد راہ تھا پئے محمل تمام راہ

کس کا غبار تھا کہ یہ دنبالہ گرد تھا

دل کی شکستگی نے ڈرائے رکھا ہمیں

واں چیں جبیں پر آئی کہ یاں رنگ زرد تھا

مانند حرف صفحۂ ہستی سے اٹھ گیا

دل بھی مرا جریدۂ عالم میں فرد تھا

تھا پشتہ ریگ باد یہ اک وقت کارواں

یہ گرد باد کوئی بیاباں نورد تھا

گزری مدام اس کی جوانان مست میں

پیر مغاں بھی طرفہ کوئی پیر مرد تھا

عاشق ہیں ہم تو میرؔ کے بھی ضبط عشق کے

دل جل گیا تھا اور نفس لب پہ سرد تھا