دل جو پہلے ہی سے محو رخ جاناں ہوتا

دل جو پہلے ہی سے محو رخ جاناں ہوتا

کس لئے زلف میں پھنستا جو پریشاں ہوتا

خال کیوں کر نہ قریب رخ جاناں ہوتا

دولت حسن کا کوئی تو نگہباں ہوتا

جذب کرنے کو نہ گر گوشۂ داماں ہوتا

میرے اشکوں سے بپا نوح کا طوفاں ہوتا

جلوۂ مصحف عارض جو نظر آ جاتا

ہندوی خال بھی سو جاں سے مسلماں ہوتا

قدر دیوانوں کی صحرائے جنوں گر کرتا

خار تک بخیہ گر چاک گریباں ہوتا

رنگ تو خیر مسیحائی کہاں سے لاتا

کیوں خجل لب سے ترے لعل نہ ایجاں ہوتا

قیس و فرہاد کا پھر نام نہ لیتا کوئی

مجھ سے آباد نہ گر کوہ و بیاباں ہوتا

روکش چہرۂ دل دار وہ ہوتا کیوں کر

داغ کھاتا جو مقابل مہ کنعاں ہوتا

دل سے گر شوق شہادت کا نہ ہوتا مجھ کو

مثل گل زخم جگر کس لئے خنداں ہوتا

میں وہ مجنوں ہوں کہ صحرا میں قدم گر رکھتا

آ کے پابوس وہیں خار مغیلاں ہوتا

بیڑیاں توڑ کے ہم زلف میں جا کر پھنستے

گر کہیں جوش جنوں سلسلہ جنباں ہوتا

آبرو وہ مرے رونے کی جو کرتا کچھ بھی

اشک سے میرے خجل گوہر غلطاں ہوتا

بہرہ گر دولت اسلام سے کافر پاتا

خال رخسار صنم حافظ قرآں ہوتا

عادت رحم حسینوں میں نہیں جب طالبؔ

کیوں مرے قتل سے وہ ترک پشیماں ہوتا

dil jo pahle hi se mahw-e-rukh janan hota

kis liye zulf mein phansta jo pareshan hota

khal kyun kar na qarib rukh janan hota

daulat-e-husn ka koi to nigahban hota

jazb karne ko na gar gosha-e-daman hota

mere ashkon se bapa nuh ka tufan hota

jalwa-e-mushaf-e-ariz jo nazar a jata

handawi khal bhi so jan se musalman hota

qadr diwanon ki sahra-e-junun gar karta

khar tak bakhiya gar chak-e-gareban hota

rang to khair masihai kahan se lata

kyun khajil lab se tire laal na ijan hota

qais-o-farhad ka phir nam na leta koi

mujh se abad na gar koh-o-bayaban hota

rukash-e-chehra-e-dil dar wo hota kyun kar

dagh khata jo muqabil mah-e-kanan hota

dil se gar shauq-e-shahadat ka na hota mujh ko

misl-e-gul zakhm-e-jigar kis liye khandan hota

main wo majnun hun ke sahra mein qadam gar rakhta

a ke pabos wahin khar-e-mughilan hota

beriyan tor ke ham zulf mein ja kar phanste

gar kahin josh-e-junun silsila jumban hota

abru wo mire rone ki jo karta kuchh bhi

ashk se mere khajil gauhar-e-ghaltan hota

bahra gar daulat-e-islam se kafir pata

khal-e-rukhsar sanam hafiz-e-quran hota

adat-e-rahm hasinon mein nahin jab talib

kyun mire qatl se wo tark-e-pasheman hota