دل دھڑکتا ہے کہ تو یار ہے سودائی کا — اشرف علی فغاں

Arooz is now on the App Store, for iPhone and iPad. Download →

اشرف علی فغاں

دل دھڑکتا ہے کہ تو یار ہے سودائی کا

تیرے مجنوں کو کہاں پاس ہے رسوائی کا

برگ گل سے بھی کم اب کوہ غم اس نے جانا

یہ بھروسا تو نہ تھا دل کی توانائی کا

کیجیے چاک گریباں کو بہار آئی ہے

ذکر بے لطف ہے یاں صبر و شکیبائی کا

سرو ثابت قدم اس واسطے گلشن میں رہا

نہیں دیکھا کبھی جلوہ تری رعنائی کا

زور منظور نظر تو تو فغاںؔ رکھتا ہے

میں تو بندہ ہوں تری چشم کی بینائی کا