دل جدا مال جدا جان جدا لیتے ہیں

دل جدا مال جدا جان جدا لیتے ہیں

اپنے سب کام بگڑ کر وہ بنا لیتے ہیں

ہو ہی رہتا ہے کسی بت کا نظارہ تا شام

صبح کو اٹھ کے جو ہم نام خدا لیتے ہیں

مجلس وعظ میں جب بیٹھتے ہیں ہم میکش

دختر رز کو بھی پہلو میں بٹھا لیتے ہیں

ایسے بوسے کے عوض مانگتے ہیں دل کیا خوب

جی میں سوچیں تو وہ کیا دیتے ہیں کیا لیتے ہیں

اپنی محفل سے اٹھائے ہیں عبث ہم کو حضور

چپکے بیٹھے ہیں الگ آپ کا کیا لیتے ہیں

بت بھی کیا چیز ہیں اللہ سلامت رکھے

گالیاں دے کے غریبوں کی دعا لیتے ہیں

شاخ مرجاں میں جواہر نظر آتے ہیں امیرؔ

کبھی انگلی جو وہ دانتوں میں دبا لیتے ہیں

dil juda mal juda jan juda lete hain

apne sab kam bigar kar wo bana lete hain

ho hi rahta hai kisi but ka nazara ta sham

subh ko uth ke jo ham nam-e-khuda lete hain

majlis-e-waaz mein jab baithte hain ham maikash

dukhtar-e-raz ko bhi pahlu mein bitha lete hain

aise bose ke ewaz mangte hain dil kya khub

ji mein sochen to wo kya dete hain kya lete hain

apni mahfil se uthae hain abas ham ko huzur

chupke baithe hain alag ap ka kya lete hain

but bhi kya chiz hain allah salamat rakhe

galiyan de ke gharibon ki dua lete hain

shakh-e-marjan mein jawahir nazar ate hain amir

kabhi ungli jo wo danton mein daba lete hain