خرد فریب نظاروں کی کوئی بات کرو

خرد فریب نظاروں کی کوئی بات کرو

جنوں نواز بہاروں کی کوئی بات کرو

کسی کی وعدہ خلافی کا ذکر خوب نہیں

مرے رفیق ستاروں کی کوئی بات کرو

زمانہ ساز زمانے کی بات رہنے دو

خلوص دوست کے ماروں کی کوئی بات کرو

گھٹا کی اوٹ سے چھپ کر جو دیکھتے تھے ہمیں

انہیں شریر ستاروں کی کوئی بات کرو

زمانہ ذکر حوادث سے کانپ اٹھتا ہے

سکوں بہ دوش کناروں کی کوئی بات کرو

نہیں ہے حد نظر تک وجود ساحل کا

فضا مہیب ہے دھاروں کی کوئی بات کرو

سلام شوق لیے تھے کسی نے جن سے شکیبؔ

انہیں لطیف اشاروں کی کوئی بات کرو

khirad fareb nazaron ki koi bat karo

junun nawaz baharon ki koi bat karo

kisi ki waada khilafi ka zikr khub nahin

mire rafiq sitaron ki koi bat karo

zamana saz zamane ki bat rahne do

khulus-e-dost ke maron ki koi bat karo

ghata ki ot se chhup kar jo dekhte the hamen

unhen sharir sitaron ki koi bat karo

zamana zikr-e-hawadis se kanp uthta hai

sukun ba dosh kinaron ki koi bat karo

nahin hai had-e-nazar tak wajud sahil ka

faza muhib hai dharon ki koi bat karo

salam-e-shauq liye the kisi ne jin se shakeb

unhen latif isharon ki koi bat karo