خفا اس سے کیوں تو مری جان ہے — میر اثر

Arooz is now on the App Store, for iPhone and iPad. Download →

خفا اس سے کیوں تو مری جان ہے

اثرؔ تو کوئی دم کا مہمان ہے

تیرے عہد میں سخت اندھیر ہے

کہ عشق و ہوس ہر دو یکسان ہے

کہوں کیا خدا جانتا ہے صنم

محبت تری اپنا ایمان ہے

دل و غم میں اور سینہ و داغ میں

رفاقت کا یاں عہد و پیمان ہے

تجھے بھی کبھو کچھ مرا ہے خیال

مجھے مرتے مرتے ترا دھیان ہے

نہ دیکھا پھر آخر کہ مشکل پڑی

ادھر دیکھنا ایسا آسان ہے

قیامت یہی ہے کہ ابرو کماں

تجھے جن نے دیکھا سو قربان ہے

گلوں کی طرح چاک کا اے بہار

مہیا ہر اک یاں گریبان ہے

بھلا دید کر لیجئے مفت ہے

کہ اب تک ستم گر وہ انجان ہے

مجھے قتل کرتے تو اونیں کیا

پر اپنے کئے پر پشیمان ہے

نہیں ہے یہ قاتل تغافل کا وقت

خبر لے کہ باقی ابھی جان ہے

تأمل کہاں ورنہ چوں غنچہ یاں

جو سر ہے سو غرق گریبان ہے

یہ کیا ہو گیا دیکھتے دیکھتے

اثرؔ میں تو میں وہ بھی حیران ہے