خط کے آتے ہی وہ مکھڑے کی صفائی کیا ہوئی

خط کے آتے ہی وہ مکھڑے کی صفائی کیا ہوئی

وہ منش کیدھر گئے وہ میرزائی کیا ہوئی

ہم نہ کہتے تھے کہ پیارے جان اہل دل کی قدر

اب وہ دل کیدھر گئے وہ دل ربائی کیا ہوئی

زور کرتا ہے اک عالم نا توانوں پر ترے

اے سپہر دوں تری زور آزمائی کیا ہوئی

شیخ جی آیا نہ مسجد میں وہ کافر ورنہ ہم

پوچھتے تم سے کہ اب وہ پارسائی کیا ہوئی

روئیے اس غم کدے میں آہ کس کس کو کہ یاں

دیکھتے نظروں کے اپنی اک خدائی کیا ہوئی

اے وفا بیگانہ تھا تو بھی تو ہم سے آشنا

وہ وفا کیدھر گئی وہ آشنائی کیا ہوئی

گو کسی حالت میں ہو قائمؔ میں سمجھوں ہوں تجھے

ہے تو تو وہ ہی پہ تیری کبریائی کیا ہوئی

khat ke ate hi wo mukhre ki safai kya hui

wo manish kidhar gae wo mirzai kya hui

ham na kahte the ke pyare jan ahl-e-dil ki qadr

ab wo dil kidhar gae wo dil rabai kya hui

zor karta hai ik alam na tawanon par tire

ai sipehr-e-dun tiri zor azmai kya hui

shaikh ji aya na masjid mein wo kafir warna ham

puchhte tum se ke ab wo parsai kya hui

roiye is gham kade mein ah kis kis ko ke yan

dekhte nazron ke apni ik khudai kya hui

ai wafa begana tha tu bhi to ham se ashna

wo wafa kidhar gai wo ashnai kya hui

go kisi halat mein ho qaim mein samjhun hun tujhe

hai to to wo hi pe teri kibriyai kya hui