خراج عقیدت

اک نیا پیغمبر‌ امن و اماں پیدا ہوا

کارواں میں اک امیر کارواں پیدا ہوا

ایک خضر عصر حاضر اک کلیم عہد نو

ایک صدر محفل روحانیاں پیدا ہوا

اک حدی خوان محبت اک نقیب اتحاد

اک فدائے سوز ناقوس و اذاں پیدا ہوا

حق کا سودائی حقیقت کا علم کھولے ہوئے

صدق کا شیدا صفا کا پاسباں پیدا ہوا

سر بسر اک مژدۂ تسکین مردان ضعیف

قوت بازوئے یاران جواں پیدا ہوا

اس چمن کی سرزمیں ہے روکش ہفت آسماں

اس چمن میں طائر عرش آشیاں پیدا ہوا

اک گل تازہ جو مرجھا کر بھی مرجھایا نہیں

صفحۂ ہستی پہ نقش جاوداں پیدا ہوا

خوں سے اس کے آج بھی گل رنگ ہے خاک وطن

فخر عالم نازش ہندوستاں پیدا ہوا

ik naya paighambar-e-amn-o-aman paida hua

karwan mein ik amir-e-karwan paida hua

ek khizr-e-asr-e-hazir ik kalim-e-ahd-e-nau

ek sadr-e-mahfil-e-ruhaniyan paida hua

ik hadi khwan-e-mohabbat ik naqib-e-ittihad

ik fida-e-soz-e-naqus-o-azan paida hua

haq ka saudai haqiqat ka alam khole hue

sidq ka shaida safa ka pasban paida hua

sar basar ik muzhda-e-taskin-e-mardan-e-zaif

quwwat-e-bazu-e-yaran-e-jawan paida hua

is chaman ki sarzamin hai rukash-e-haft asman

is chaman mein tair-e-arsh-e-ashiyan paida hua

ik gul-e-taza jo murjha kar bhi murjhaya nahin

safha-e-hasti pe naqsh-e-jawedan paida hua

khun se us ke aj bhi gul rang hai khak-e-watan

fakhr-e-alam nazish hindostan paida hua