خنک جوشی نہ کرتے جوں صبا گر یہ بتاں ہم سے

خنک جوشی نہ کرتے جوں صبا گر یہ بتاں ہم سے

تو مثل غنچۂ گل دل نہ جاتا رائیگاں ہم سے

پھرے اس زلف و رو کے عشق میں دونوں جہاں ہم سے

ادھر کفار پھر گئے سب ادھر ایمانیاں ہم سے

عدو تھے مالی اور صیاد گلچیں نے قیامت کی

خدا لعنت کرے تینوں پہ چھوٹا گلستاں ہم سے

اجاڑا گریہ‌‌ و شور جنوں کے واسطے ہم کو

ولے گلشن کو اور آب و نمک تھا باغباں ہم سے

ہمیں تو راستی جوں تیر ہرگز راس آئی نیں

ہمیشہ ٹیڑھے ہی رہتے ہیں یہ ابرو کماں ہم سے

عقب یاروں کے سر پر خاک کرتے ہم بھی جاتے ہیں

رہا جاتا نہیں جوں گرد راہ کارواں ہم سے

ہمیں طفلاں تو پتھروں کی محبت سے نہ بھولیں گے

چلے صحرا کو ہم پھر گئے بلا سے شہریاں ہم سے

ہمیں ٹک ذبح کر لے سایۂ گلبن میں جیتا رہ

چھڑایا تو نے گر صیاد گل کا آستاں ہم سے

مزے میں درد سر کے کب سے محتاج دوا عزلتؔ

عبث اے صندلی رنگو ہوئے ہو سرگراں ہم سے

khunuk joshi na karte jun saba gar ye butan ham se

tu misl-e-ghuncha-e-gul dil na jata raigan ham se

phire is zulf-o-ro ke ishq mein donon jahan ham se

idhar kuffar phir gae sab idhar imaniyan ham se

adu the mali aur sayyad gulchin ne qayamat ki

khuda laanat kare tinon pe chhota gulsitan ham se

ujara girya-o-shor-e-junun ke waste ham ko

wale gulshan ko aur ab-o-namak tha baghban ham se

hamen to rasti jun tir hargiz ras ai nain

hamesha terhe hi rahte hain ye abru kaman ham se

aqab yaron ke sar par khak karte ham bhi jate hain

raha jata nahin jun gard-e-rah-e-karwan ham se

hamen tiflan to pattharon ki mohabbat se na bhulenge

chale sahra ko ham phir gae bala se shahriyan ham se

hamen tuk zabh kar le saya-e-gulban mein jita rah

chhuraya tu ne gar sayyad gul ka astan ham se

maze mein dard-e-sar ke kab se mohtaj-e-dawa-e-uzlat

abas ai sandali rango hue ho sargiran ham se