خزاں کا جو گلشن سے پڑ جائے پالا

خزاں کا جو گلشن سے پڑ جائے پالا

تو صحن چمن میں نہ گل ہو نہ لالہ

لیا تیرے عاشق نے برسوں سنبھالا

بہت کر گیا مرنے والا کسالا

پئے فاتحہ ہاتھ اٹھاوے گا کوئی

سر تربت بیکساں آنے والا

اسی گریہ کے تار سے میری آنکھیں

بنا دیں گی ندی بہا دیں گی نالہ

بٹھا کر تمہیں شمع کے پاس دیکھا

تم آنکھوں کی پتلی وہ گھر کا اجالا

خط شوق کو پڑھ کے قاصد سے بولے

یہ ہے کون دیوانہ خط لکھنے والا

دیا حکم ساقی کو پیر مغاں نے

پئے محتسب جام و مینا اٹھا لا

یہ سنتے ہی مے خوار بولے خوشی سے

ہمیں سا ہے یہ نیک اللہ والا

حقیقت میں سائلؔ نے ذوق ادب سے

جہاں تک اچھالا گیا نام اچھالا

khizan ka jo gulshan se par jae pala

tu sehn-e-chaman mein na gul ho na lala

liya tere ashiq ne barson sambhala

bahut kar gaya marne wala kasala

piye fatiha hath uthawega koi

sar-e-turbat-e-bekasan ane wala

isi girya ke tar se meri ankhen

bana dengi naddi baha dengi nala

bitha kar tumhen shama ke pas dekha

tum ankhon ki putli wo ghar ka ujala

khat-e-shauq ko parh ke qasid se bole

ye hai kaun diwana khat likhne wala

diya hukm saqi ko pir-e-mughan ne

piye mohtasib jam-o-mina utha la

ye sunte hi mai khwar bole khushi se

hamen sa hai ye nek allah wala

haqiqat mein sail ne zauq-e-adab se

jahan tak uchhala gaya nam uchhala