داغ دل ہم کو یاد آنے لگے
باقی صدیقیداغ دل ہم کو یاد آنے لگے
لوگ اپنے دیئے جلانے لگے
کچھ نہ پا کر بھی مطمئن ہیں ہم
عشق میں ہاتھ کیا خزانے لگے
یہی رستہ ہے اب یہی منزل
اب یہیں دل کسی بہانے لگے
خود فریبی سی خود فریبی ہے
پاس کے ڈھول بھی سہانے لگے
اب تو ہوتا ہے ہر قدم پہ گماں
ہم یہ کیسا قدم اٹھانے لگے
اس بدلتے ہوئے زمانے میں
تیرے قصے بھی کچھ پرانے لگے
رخ بدلنے لگا فسانے کا
لوگ محفل سے اٹھ کے جانے لگے
ایک پل میں وہاں سے ہم اٹھے
بیٹھنے میں جہاں زمانے لگے
اپنی قسمت سے ہے مفر کس کو
تیر پر اڑ کے بھی نشانے لگے
ہم تک آئے نہ آئے موسم گل
کچھ پرندے تو چہچہانے لگے
شام کا وقت ہو گیا باقیؔ
بستیوں سے شرار آنے لگے
dagh-e-dil ham ko yad ane lage
log apne diye jalane lage
kuchh na pa kar bhi mutmain hain ham
ishq mein hath kya khazane lage
yahi rasta hai ab yahi manzil
ab yahin dil kisi bahane lage
khud farebi si khud farebi hai
pas ke dhol bhi suhane lage
ab to hota hai har qadam pe guman
ham ye kaisa qadam uthane lage
is badalte hue zamane mein
tere qisse bhi kuchh purane lage
rukh badalne laga fasane ka
log mahfil se uth ke jane lage
ek pal mein wahan se ham uthe
baithne mein jahan zamane lage
apni qismat se hai mafar kis ko
tir par ur ke bhi nishane lage
ham tak ae na ae mausam-e-gul
kuchh parinde to chahchahane lage
sham ka waqt ho gaya baqi
bastiyon se sharar ane lage